Veño de mercar un teléfono móbil --- por certo, o meu teléfono móbil, porque cansei de agardar a que algo baseado en OpenMoko (coma o Neo1970) ou en Google Android se fixese público dunha vez. Así que collín un teléfono de gama o mais baixa posible, pero estou bastante contento co resultado --- é un Toshiba TS705 que cumple sobradamente as expectativas que del tiña.

E se ben a funcionalidade principal que necesito do teléfono é facer e recibir chamadas (requerimento profesional) outra desas expectativas é navegar por internés. Collín o móbil con Yoigo, entre outras cousas porque cobran 1.2 euros/día de tarifa plana de internet, o que é mais barato que, digamos, o módem USB de Vodafone (e iso supoñendo que empregues a internés tódolos días).

O caso é que unha vez co trebello nas mans, e logo de comprobar que o navegador que trae de serie non está mal pero que non é pra facer sesións de horas conectado, decidín lanzarme a buscar cómo emprega-lo teléfono de ponte para o ordenador. E isto nos leva ó tema deste artigo: cómo conectar o ordenador a internet empregando o Toshiba TS705.

O artigo está bastante ben explicado (lembrade que é un blogue, logo tedes que o ler do revés) e non fixen nada moi diferente do que alí hai, ca salvidade de que emprego Debian Sid en troques de Ubuntu. Publico isto, sobre todo, pra que se alguén ten o mesmo trebello e quere intercambiar experiencias teña un sitio onde escribir.

Tamén aproveito pra dicir que non atopei xeito de acceder ós arquivos do teléfono --- anque funciona como módem, non semella haber xeito de cargalo con imaxes ou arquivos doutro tipo. Polo que lin, isto é porque o teléfono non soporta obexftp, o que é unha mágoa. Seguirei investigando, pero agradécese calquera axuda.