«Propagaliza, unha tipografía para a propaganda galega.»

[ Incorpora maiúsculas e minúsculas, acentos (agudos) para as minúsculas, números e símbolos tipográficos, eñe e cedilla. Futuras versións (talvez) incorporarán acentos graves, nasais, acentos para as maiúsculas, e talvez algo mais. ]

"Propaganda", segundo o diccionario da RAG:

propaganda s.f. 1. Actividade organizada para difundi-las calidades, propiedades ou o valor de alguén, dunhas ideas ou dun producto comercial. Faille moita propaganda ó seu partido. 2. Material ou medio (anuncios, carteis, etc.) utilizado para ese fin. No descanso da película, botaron propaganda. Durante as eleccións, repartiron propaganda polas casas. u SIN. publicidade.CF. reclamo.

É un termo cunha calidade política, ideolóxica, definida. Hai un borde onde se difumina e se mistura ca publicidade, e a xente tende a confundilos. Pero eu --- porque sempre fun amante das causas perdidas --- gosto de reivindica-lo dereito ó seu bo uso, e ó matiz.

publicidade s.f. 1. Feito ou circunstancia de ser ou facer público algo. Non interesa darlle moita publicidade á noticia. CF. difusión. A publicidade do asunto fai que todo o mundo poida opinar libremente sobre el. 2. Arte ou acción de influír na psicoloxía da xente con fins comerciais, e actividade, medios e técnicas que se empregan con este propósito. Aparece na televisión facendo publicidade dun deterxente. SIN. propaganda.Hoxe en día a publicidade ten moitos medios ó seu alcance. Estudios de publicidade. Axencia de publicidade. 3. Material ou medios (folletos, anuncios, etc.) utilizados para ese fin. A publicidade na radio e na televisión. Publicidade política. SIN. propaganda.CF. reclamo.

Obsérvese a diferencia de intención entre as dúas definicións. Están listadas como sinónimos, pero ninguén lle chama "publicidade" ós cartaces da Guerra Civil ou da Revolución Soviética. A propaganda ten como fin a presentación pública dunhas ideas --- boas ou malas, pero ideas, como oposto á promoción dun produto comercial.

Para os que somos idealistas irredentos, a propaganda ten, se queredes, unha certa voz de mito.

Esta fonte é un primeiro experimento, en moitos sentidos. É experimento porque é a primeira fonte que tento facer nunca. É experimento tamén porque é un intento (en apariencia exitoso) de usar o Inkscape e o FontForge, ámbolos dous Software Ceibe, pra crear unha tipografía.

E é experimento tamén no senso estilístico, porque tentei acadar unha tipografía que fose marcadamente galega, pero que tivese ó mesmo tempo un aire constructivista, de cartelería do primeiro tercio do século XX, de grande movemento de masas.

Non estou moi seguro de telo acadado, pero penso que pra ser un primeiro intento non está mal tampouco.